काठमाडौँ, साउन २ । नेपाल राष्ट्र बैंकले बैंकिङ प्रणालीमा अधिक तरलता भएपछि ५० अर्ब रुपैयाँ तरलता खिच्ने भएको छ । बुधबार निक्षेप संकलन बोलकबोल मार्फत तरलता खिच्न लागेको हो ।
स्थायी निक्षेप सुविधा मार्फत निरन्तर तरलता खिचिरहेको केन्द्रीय बैंकले बुधबार निक्षेप संकलन बोलकबोल मार्फत ५० अर्ब रुपैयाँ तरलता बैंकिङ प्रणालीबाट खिच्न लागेको हो ।
केन्द्रीय बैंकले २१ दिन अवधिको लागि उक्त रकम बराबरको तरलता खिच्ने छ ।उक्त निक्षेप संलकन उपकरणको ब्याजदर अपराह्न ३ बजे बोलकबोलबाट तय हुनेछ ।
आगामी साउन २३ गते उक्त रकमको साँवा तथा ब्याज भुक्तानी गरिने सूचनामा उल्लेख छ।नेपाल राष्ट्र बैंकका अनुसार बैंकिङ प्रणालीमा बढी भएको ३ खर्ब ७३ अर्ब तरलता खिचिएको छ । नेपाल राष्ट्र बैंकको असार ३०गतेसम्मको तथ्यांक अनुसार बैंक तथा वित्तीय संस्थाको कुल निक्षेप ६४ खर्ब ८२अर्ब पुग्दा कुल कर्जा ५१ खर्ब ६० अर्ब पुगेको छ ।
बैंकहरुको कर्जा निक्षेप अनुपात (सीडी रेसियो) ७७.६१ प्रतिशतमा झरेको छ । यस्तै अन्तर बैंक ब्याजदर पनि २.९३ प्रतिशत छ ।
