काठमाडौं । नेपाल विद्युत् प्राधिकरणलाई १० अर्ब ऋण लिन सरकारले स्वीकृति दिएको छ । विद्युत् प्राधिकरणका अनुसार अर्थ मन्त्रालयले अल्पकालीन ऋण लिने प्राधिकरणको प्रस्तावलाई बुधवार स्वीकृत गरेको हो ।
नेपाल विद्युत् प्राधिकरणका प्रमुख कार्यकारी निर्देशक हितेन्द्रदेव शाक्यले प्राधिकरणको प्रस्तावलाई स्वीकृत गरेको बताए । उनले अर्थ मन्त्रालयले ऋण लिन स्वीकृति गरेको प्रस्ताव ऊर्जा मन्त्रालयले पनि स्वीकृत गरेको राटोपाटीलाई जानकारी दिए ।
उनले भने– ‘अर्थ मन्त्रालयबाट प्राधिकरणको प्रस्ताव अनुसार सर्टटम लोनको स्वीकृति दिएको छ । ऊर्जा मन्त्रालयले छलफल गरेर पनि स्वीकृत गरिसकेको छ । मन्त्रालयले स्वीकृत गरेको पत्र आउन बाँकी छ । मन्त्रालयले स्वीकृत गरेर पत्र पठाएसँगै ऋण लिने प्रक्रिया अघि बढाउँछौँ ।’
प्राधिकरणको नेतृत्वमा आएसँगै शाक्यले प्राधिकरणको स्वेतपत्र जारी गर्दै अल्पकालीन ऋण लिने निर्णय गरेका थिए । उक्त निर्णयअनुसार अल्पकालीन ऋण लिनको लागि अर्थ मन्त्रालयको स्वीकृतका लागि प्राधिकरणले प्रस्ताव पठाएको थियो ।
त्यसपछि शाक्यले हरेक कार्यक्रममा प्राधिकरणले आवश्यक भौतिक पूर्वाधार निर्माणको लागि पर्याप्त रकम प्राधिकरणसँग नभएको बताउँदै आएका छन् । प्रसारण लाइन तथा ट्रान्समिसन थप गर्नको लागि लगानीको आवश्यक रहेको उनले धारणा राख्दै आएका छन् ।
शाक्यले जारी गरेको स्वेतपत्रमा प्राधिकरणले चालु आर्थिक वर्षको फागुन मसान्तसम्म ठेक्काको लागि ११ अर्ब ६१ करोड रुपैयाँ भुक्तानी गर्न बाँकी रहेको उल्लेख थियो । त्यसैले प्राधिकरणले भुक्तानीका लागि जगेडा पैसा नरहेको र त्यसका लागि १० अर्बसम्म अल्पकालीन ऋण लिने प्रक्रिया अगाडि बढाएको थियो ।
प्राधिकरणको कोषमा १० अर्ब १० करोड रकम रुपैयाँ रहेको छ । जसमा डलररनेरू मुद्दती खातामा तीन अर्ब ६८ करोड र धरौटी खातामा तीन अर्ब ९५ करोड रुपैयाँ रहेको प्राधिकरणले जनाएको छ ।
