काठमाडौं । गोल्छा ग्रुपअन्तर्गतको सांग्रिला मोटर्सले लिपमोटरको नयाँ ‘बी १०’ एसयूभी नेपाली बजारमा सार्वजनिक गरेको छ ।भृकुटीमण्डपमा सुरु भएको नेपाल अन्तर्राष्ट्रिय मोटर एक्सपो (नाइमा) मा लिपमोटरले आफ्नो नयाँ इलेक्ट्रिक एसयूभी ‘बी१०’ सार्वजनिक गरेको हो ।
कम्पनीका अनुसार यो गाडी इभी प्लेटफर्म ३.५ आर्किटेक्चरमा तयार पारिएको छ। नयाँ ‘बी१०’ मा आधुनिक प्रविधिसहित एड्भान्स्ड ड्राइभर असिस्टेन्ट सिस्टम समेत उपलब्ध रहेको छ।
यो गाडीमा स्मार्ट पार्किङ सुविधा सहित कुल १६ वटा फङ्सनहरू छन्। यस्तै, भित्र १४.६ इन्चको सस्पेन्डेड टचस्क्रिन, ८.८ इन्चको एलसीडी इन्स्ट्रुमेन्ट क्लस्टर र टु-स्पोक डी-आकारको स्टेयरिङ ह्वील राखिएको छ।
कम्पनीका अनुसार अन्तर्राष्ट्रिय बजारमा उपलब्ध यो इलेक्ट्रिक एसयूभीमा १६० किलोवाट क्षमताको रियर माउन्टेड मोटर प्रयोग गरिएको छ। एकपटकको पूर्ण चार्जमा ‘बी१०’ ले करिब ५०० किलोमिटरसम्म यात्रा गर्न सक्ने क्षमता राख्दछ, जसले लामो दूरीका यात्रामा पनि सहजता प्रदान गर्नेछ।
यो गाडी दुई भेरियन्टमा उपलब्ध रहेको छ। पहिलो भेरियन्टको मूल्य ४९ लाख ९९ हजार रुपैयाँ रहेको छ भने दोस्रो उच्च संस्करणको मूल्य ५६ लाख ९९ हजार रुपैयाँ तोकिएको छ।
