काठमाडौं । अर्थमन्त्री रामेश्वरप्रसाद खनालले अर्थतन्त्रलाई गतिशील बनाउन बजारमुखी उदार आर्थिक नीतिलाई नै निरन्तरता दिनुपर्नेमा जोड दिएका छन् । उनले बजारको स्वतन्त्रतालाई अंकुश नलगाईकनै अर्थतन्त्रलाई अघि बढाउनु वर्तमानको मुख्य आवश्यकता रहेको बताएका छन् ।
नेपाल राष्ट्र बैंकद्वारा आयोजित ‘डा यादवप्रसाद पन्तको बहुआयामिक व्यक्तित्व र नेपालको अर्थतन्त्रमा उहाँको योगदान’ विषयक विचारगोष्ठीमा बोल्दै मन्त्री खनालले राजनीतिक तथा नीतिगत अस्थिरता नेपालको दीर्घकालीन चुनौती बनेको उल्लेख गरे ।
उनले अर्थतन्त्र निराशाजनक नरहेको दाबी गर्दै हाल करिब ८ प्रतिशत कर्जा वृद्धिले लक्षित आर्थिक वृद्धिदर प्राप्त गर्न सकिने विश्वास व्यक्त गरे । नेपाल राष्ट्र बैंक र अर्थ मन्त्रालयबीच राम्रो नीतिगत समन्वय रहेको उल्लेख गर्दै उनले आर्थिक नीति तथा राजनीतिक व्यवस्थाले कहिलेकाहीँ दिशा भुल्ने गरेको टिप्पणी गरे ।
मन्त्री खनालले डा यादवप्रसाद पन्तको योगदान स्मरण गर्दै आन्तरिक अर्थतन्त्रलाई अन्तर्राष्ट्रिय संयन्त्रसँग जोड्ने र कृषिक्षेत्रलाई उद्योगसँग समन्वय गराउने कार्यमा उहाँले ऐतिहासिक भूमिका निर्वाह गरेको बताए ।
