पाल्पा । पाल्पामा शनिबार (चैत ७) बेलुका भएको टिपर दुर्घटनामा मृत्यु हुनेको संख्या चार पुगेको छ । दुर्घटनामा परी अर्घाखाँचीको शितगंगा नगरपालिका–४, सिद्धारका २६ वर्षीय चिन्ताबहादुर सुनार, सोही ठाउँका २६ वर्षीय सुनिल विक, रुपन्देहीको देवदह नगरपालिका–२, खैरेनीका २६ वर्षीय सुनिल नेपाली र तानसेन नगरपालिका–१०, पटुवाका ३३ वर्षीय राजन चिदीको मृत्यु भएको जिल्ला प्रहरी कार्यालयका सूचना अधिकारी एवं डीएसपी होमप्रकाश चौधरीले बताए ।
रुपन्देहीको भैरहवा मेडिकल कलेजमा उपचारका क्रममा चिदीको मृत्यु भएको हो । अरू तीनजनाको यसअघि मृत्यु भएको थियो ।पाल्पाको माथागढी गाउँपालिका–७, रहबासस्थित झडेवा–रहबास भित्री कच्ची सडकखण्डमा लु२ख ४५२५ नम्बरको टिपर दुर्घटना भएको थियो । उक्त टिपर झडेवाबाट रहबास चुनढुंगा खानीतर्फ जाँदै गर्दा सडकबाट करिब ५० मिटर तल खसेको थियो । दुर्घटनाको थप अनुसन्धान भइरहेको जिल्ला प्रहरी कार्यालयले जनाएको छ ।
