काठमाडौँ / एनआईसी एशिया बैंक लिमिटेडका ग्राहकहरूले काठमाडौँस्थित एभरेष्ट हस्पिटलमा उपचार गर्दा १५ प्रतिशतसम्म छुट सुविधा पाउने भएका छन् ।
बैंक र एभरेष्ट हस्पिटलबीच यस सम्बन्धमा समझदारी पत्रमा हस्ताक्षर भएसँगै यस्तो सुविधा लागु भएको हो ।
सम्झौताअनुसार ग्राहकहरूले हस्पिटलका विभिन्न सेवामा (आउटसोर्स सेवा, डाक्टर परामर्श र एम्बुलेन्स शुल्क बाहेक) डिजिटल भुक्तानी गर्दा १५ प्रतिशत छुट पाउनेछन् ।
साथै, अपरेसन सेवामा ५ प्रतिशत र फार्मेसीबाट औषधि खरिद गर्दा १० प्रतिशत छुट उपलब्ध गराइनेछ ।
उक्त सुविधाको लाभ लिन ग्राहकले बैंकको डेबिट कार्ड, क्रेडिट कार्ड वा मोबाइल बैंकिङ एप ‘मोबैंक’मार्फत भुक्तानी गर्नुपर्ने व्यवस्था गरिएको छ ।
बैंकका तर्फबाट चिफ ट्रान्जेक्सन बैंकिङ नरेन्द्र मैनाली र हस्पिटलका प्रशासन प्रमुख दिपक चन्द्र बरालबीच समझदारीमा हस्ताक्षर भएको हो ।
बैंकले यस सहकार्यबाट ग्राहकलाई स्वास्थ्य सेवामा सहुलियत मिल्नुका साथै डिजिटल भुक्तानी प्रवर्द्धन भई नगदरहित कारोबारमा टेवा पुग्ने विश्वास व्यक्त गरेको छ ।
