काठमाडौं । ग्लोबल आइएमई बैंकले चालु आर्थिक वर्षको पहिलो तीन महिनामा आफ्नो नाफा उल्लेख्य रूपमा बढाएको छ । बैंकले सार्वजनिक गरेको असोज मसान्तसम्मको वित्तीय विवरणअनुसार गत वर्षको तुलनामा यस वर्ष नाफा २४.४८ प्रतिशतले वृद्धि भएको हो ।
बैंकले चालु आर्थिक वर्षको पहिलो त्रैमासमा २ अर्ब ३१ करोड ३८ लाख रुपैयाँ खुद नाफा कमाएको छ । गत आर्थिक वर्षको सोही अवधिमा बैंकको नाफा १ अर्ब ८५ करोड ८६ लाख रुपैयाँ थियो ।
यस अवधिमा बैंकको खुद ब्याज आम्दानी ४ अर्ब १९ करोड रुपैयाँ पुगेको छ । त्यस्तै, शुल्क तथा कमिसनबाट १ अर्ब २२ करोड रुपैयाँभन्दा बढी आम्दानी गरेको छ । बैंकको कुल सञ्चालन आम्दानी ६ अर्ब ८ करोड रुपैयाँ पुगेको छ भने सञ्चालन नाफा ३ अर्ब २२ करोड रुपैयाँभन्दा बढी रहेको छ ।
बैंकको नाफा बढेसँगै लाभांश दिन सक्ने क्षमता पनि राम्रो देखिएको छ। समीक्षा अवधिमा बैंकको वितरणयोग्य नाफा २ अर्ब ७ करोड रुपैयाँभन्दा बढी रहेको छ। यसअनुसार बैंकको लाभांश क्षमता १७.७५ प्रतिशत पुगेको छ ।
बैंकको निक्षेप र कर्जा लगानी दुवैमा वृद्धि भएको छ । असोज मसान्तसम्म बैंकले ६ खर्ब ९० अर्ब रुपैयाँ निक्षेप संकलन गरेको छ। यो गत वर्षको तुलनामा ३.११ प्रतिशत बढी हो ।
त्यस्तै, बैंकको कर्जा लगानी ७.४८ प्रतिशतले बढेर ४ खर्ब ७१ अर्ब ९६ करोड रुपैयाँ पुगेको छ । बैंकको कर्जा तथा निक्षेप अनुपात (सीडी रेसियो) ७०.११ प्रतिशत रहेको छ। यसले बैंकसँग थप कर्जा लगानी गर्न पर्याप्त रकम रहेको देखाउँछ ।
बैंकका प्रतिसेयर सूचकमा पनि सुधार आएको छ । गत वर्ष १९ रुपैयाँ ५१ पैसा रहेको प्रतिसेयर आम्दानी (ईपीएस) बढेर २३ रुपैयाँ ३५ पैसा पुगेको छ। बैंकको प्रतिसेयर नेटवर्थ १७५ रुपैयाँ ७७ पैसा रहेको छ भने मूल्य आम्दानी अनुपात १०.८८ गुणा छ ।
यसैगरी, बैंकले खराब कर्जा (एनपीएल) पनि घटाएको छ । गत वर्षको असोजमा ४.९८ प्रतिशत रहेको खराब कर्जा यस वर्षको सोही अवधिमा घटेर ४.७९ प्रतिशतमा झरेको छ ।
समग्रमा, नाफा, आम्दानी, कर्जा विस्तार र प्रतिसेयर आम्दानीमा सुधार गर्दै ग्लोबल आइएमई बैंकले चालु आर्थिक वर्षको पहिलो त्रैमासमा सकारात्मक वित्तीय प्रदर्शन गरेको छ। खराब कर्जा घटाउन सफल हुनु पनि बैंकका लागि सकारात्मक पक्ष देखिएको छ ।
