अपर तामाकोशी हाइड्रोपावरको लिमिटेडले गरेको लिलामी शेयरको कट अफ प्राइस सोमबारसम्म सार्वजनिक हुनेछ । कम्पनीको लिलामी शेयरको बिक्री प्रबन्धक नागरिक लगानी कोषका पुँजी बजार उपनिर्देशक नारायण घिमिरेले आवेदन संकलन गर्ने कार्य भइरहेको बताए । उनले भने ‘आजसम्म सबै आवेदन संकलन गरेर भाेलि सूचना निकाल्ने याेजना छ ।‘
उनले अगाडि भने –‘सबै आवेदन संकलन भएमा भोलि बिहीबार सूचना निकालेर पर्सी शुक्रबारदेखि लिलामी शेयरको सिलबन्दी बोलपत्र फर्म खुला हुनेछ । ३० हजार जनाको आवेदन परेको हुँदा आइतबारसम्म फर्म खोल्न समय लाग्नेछ । सम्भवतः लिलामीको कटअफ मूल्य सोमबारसम्ममा सार्वजनिक हुनेछ ।’
योजना अनुसार सबै कार्य भए लिलामीको शेयर भर्ने लगानीकर्ताले शेयर हात पार्न नसकेमा बुधबारसम्म सम्बन्धित आवेदककै खातामा पैसा फिर्ता हुने उनले बताए ।
अपर तामाकोशी हाइड्रोपावर लिमिटेडले १ बराबर १ को अनुपातमा निष्काशन गरेको हकप्रद शेयरको लिलामीमा ७ अर्ब रुपैयाँ भन्दा बढीको आवेदन परेको थियो । कम्पनीले हकप्रद शेयर आह्वान गर्दा नबिकेको १ करोड ७० लाख १९ हजार ५ सय ३० कित्ता शेयर लिलामीमा राखेको थियो । गुड फर पेमेन्ट समेतको रकम थपिँदा यो रकम अझै बढ्ने छ ।
