काठमाडौँ, साउन ५ । शेयर बजारमा रौनक देखि रहेको छ । नयाँ सत्ता समीकरणपछि संसदका ठुला दुई दल नेपाली कांग्रेस र नेकपा एमालेको सरकार बनेसँगै शेयर बजारका लगानीकर्ता उत्साहित भएका हुन् । अब राजनीतिक स्थिरता र पुँजी बजारले सकारात्मक दिसा तिर लम्किने आम लगानीकर्ताको विश्वास रहेको छ ।
अब भने लगानीकर्ताले पुँजी बजारलाई बल पुग्ने काम नियामकबाट हुने आश गरेका छन् । जब जब विष्णु पौडल अर्थमन्त्री बन्ने अवस्था सिर्जना हुन्छ तब तब शेयर बजारमा एकाएक उछाल आउँछ । नयाँ सत्ता गठबन्धनबाट विष्णु पौडेल अर्थमन्त्री नियुक्त भएका छन् । लगानीकर्तालाई उनलाई शेयर बजारको हितमा सोच्ने मन्त्री रुपमा चिन्छन् । उनले आफनो कार्यकालमा दुईपटक ब्रोकर कमिशन घटाएका थिए । सन् २०१५ मा उनी अर्थमन्त्री हुँदा सेयरबजार ९ सयमा चलेको थियो । उनको एक बर्षकै कार्यकालमा बजार डबल बढेर १८८१ को उच्च विन्दु चुमेको थियो । दोश्रोपटक अर्थमन्त्रालय सम्हाल्दा १३०० आसपासमा रहेको थियो । कोभिडको समयमा अर्थमन्त्री बन्न विष्णु आइपुगेका थिए । उनले दोश्रोपटक अर्थमन्त्रालयमा प्रवेश गरेपछि बजारमा उछाल आएको थियो । त्यसपछि बजारले पुनः नयाँ उचाई चुमेको थियो ।
अहिले पुनः पौडेल अर्थमन्त्रालयको जिम्मेवारीमा आइपुगेका छन् । असार ३१ गते पदभार ग्रहण गरेका पौडेल माथि लगानीकर्ताको आश ठुलो रहेको छ । आज उनले पदभार ग्रहण गर्दै शेयर बजार अर्थतन्त्रको ऐनाको रुपमा हेरिने बताएका छन् । नियामकको सक्रियताले अब शेयर बजारका लगानीकर्ताको मनोबल समेत उच्च बन्न पुगेको छ । अर्थमन्त्री पौडेल आउने हल्लाकाबीच शेयर बजारले पछिल्लो एक वर्षको परिसूचक रेकर्ड तोडेको हो । यता कारोबार रकम समेत निकै उच्च बन्न गइरहेको छ ।
यता, गर्भनर अधिकारी समेत एमाले निकट ब्यक्तिको रुपमा चिनिन्छन् । जसले गर्दा अर्थमन्त्रालय र राष्ट्र बैंकको तालमेल मिल्ने आश राखिएको छ । गर्भनर अधिकारीले समेत बेला बेला सार्वजनिक कार्यक्रममा नै मौद्रिक नीति लचिलो आउने बताउँदै आइरहेका छन् । एमाले कै सरकार आएपछि सरकार सफल बनाउनको लागि भएपनि मौद्रिक नीति लचिलो आउने आम लगानीकर्ताको विश्वास रहेको छ । अर्थतन्त्र समेत लयमा आइरहेको र बैंकको ब्याजदर समेत निरन्तर ओरालो लागि रहेको हुँदा शेयर बजारको यात्रा अब बुल हुने आश आम लगानीकर्ताले राखेका छन् ।
एमालेकै प्रधानमन्त्री, एमालेकै अर्थमन्त्री र एमाले निकट नै गर्भनर भएपछि पुँजी बजारका लागि सकारात्मक कदम चालिनेमा आम लगानीकर्ताले विश्वास गरेका छन् । मौद्रिक नीति मार्फत कसिएका पोलिसि, अर्थमन्त्री र धितोपत्र बोर्र्डले लगानीकर्तामैत्री पोलिसि ल्याउन सके बजारले नयाँ रेकर्ड चुम्ने पक्का पक्की जस्तैछ ।
प्रधानमन्त्री केपी शर्मा ओलीले मन्त्रिपरिषद्लाई पूर्णता दिएपछिका चार दिनमा नेप्से १६६ अंकले बढेर परिसुचक २४२४.३२ अंक पुगेको छ । लामो समयदेखि २ हजार बिन्दुको नजिक रहेको नेप्से चारै दिनमा २४२४ अंकमा पुगेको हो । बिहीबार मात्रै १५ अर्ब ५४ करोड रूपैयाँको कारोबार भएको थियो ।
पछिल्लो समयमा बैंक ब्याजदर घटिरहेको छ । प्रत्येक महिनाजस्तै निक्षेप र कर्जा दुवैको ब्याजदर घट्दो क्रममा रहेको छ । यसले पनि पुँजीबजारमा सुधार गर्न सहयोग पुगेको देखिन्छ । केही दिनयता सार्वजनिक मन्तव्यहरूमा राष्ट्र बैंकका गभर्नर महाप्रसाद अधिकारीले मौद्रिक नीति लचिलो आउने संकेत गर्दै आएका छन् पछिल्ला चार दिनमा सेयर बजार लयमा फर्किंदा परिसूचक २७ महिनायताकै उच्च बिन्दुमा पुगेको छ ।
गत साता कारोबार बन्द भएको दिन बिहीबार २२०४ विन्दुमा रहेको नेप्से परिसूचक आइतबार २२५७ पुगेको थियो । त्यसपछि सोमबार सामान्य करेक्सन आएर २२४० विन्दुमा झरेको परिसूचक मंगलबार २३१०, बुधबार २३६४ र बिहीबार २४२४.३२ विन्दुमा उक्लिएको हो । बिहीबार ३१२ धितोपत्रको ३ करोड ९९ लाख ३८ हजार २३७ कित्ता सेयर १ लाख ८४ हजार ७१२ पटक खरिद–बिक्री भएको थियो, जसबाट १५ अर्ब ५४ करोड रूपैयाँबराबरको कारोबार हुन पुग्यो । कारोबार भएकामध्ये पाँच धितोपत्रको मूल्य १० प्रतिशतका दरले बढेको छ ।
नेपाल इन्भेष्टमेण्ट मेगा बैंक, नेपाल फाइनान्स, आँखुखोला जलविद्युत कम्पनी, उपकार लघुवित्त वित्तीय संस्था र थ्री स्टार हाइड्रोपावर कम्पनीको सेयर मूल्य १० प्रतिशत बढेको हो । बिहीबार कुमारी सबल योजनाको इकाई मूल्य सबैभन्दा बढी ५.७६ प्रतिशत घटेको छ । यसैगरी सिन्धु विकास बैंकको सेयर मूल्य ४.५७ प्रतिशत घटेर ५०१ रूपैयाँमा झरेको छ । सर्वाधिक सेयर खरिद–बिक्रीको हिस्सा नेपाल फाइनान्सले ओगटेको छ ।
यस कम्पनीको ४२ करोड ४६ लाख रूपैयाँ बराबरको सेयर कारोबार भएको हो । त्यस्तै सर्वाधिक सेयर खरिद–बिक्री हुने दोस्रोमा अपर तामाकोशी हाइड्रोपावर कम्पनीको ३८ करोड ९१ लाख रूपैयाँबराबरको कारोबार भएको छ । बिहीबार कारो रमा आएका १३ समूहगत सूचकमध्ये दुई समूहको सूचक घटेको छ भने बाँकी सबै समूहको सूचक बढेको छ । सबैभन्दा बढी बैंकिङ समूहको सूचक ६.२८ प्रतिशत वृद्धि भएको छ भने वित्त समूहको सूचक १.२७ प्रतिशत घटेको छ ।
