काठमाण्डौ । दक्षिण कोरियाको सेयरबजारले अल टाइम हाईको रेकर्ड कायम गरेको छ । बुधबार कोस्पी इन्डेक्स १.७ प्रतिशतले बढेर ३ हजार ३१४ विन्दुमा बन्द भएको छ । यो हालसम्मकै उच्च विन्दु हो ।
विदेशी तथा संस्थागत लगानीकर्ताको आकर्षण वित्तीय र ब्लू चिप टेक कम्पनीहरुमा देखिएसँगै मध्य जुलाईदेखि ३२ सय विन्दुको आसपास रुमल्लिरहेको सेयरबजारले रेकर्ड कायम गरेको हो । दक्षिण कोरियाली सरकारले सेयरहोल्डर ट्याक्स थ्रेसहोल्डलाई खुकुलो बनाउने निर्णय गरेको छ । त्यहाँको सरकारले विदेशी लगानीकर्तालाई प्रतिस्टक ५ बिलियन कोरियन वनसम्मको सेयर होल्ड गर्न मिल्ने प्रावधान गरेको छ । यसअघि यस्तो सीमा प्रतिस्टक १ बिलियन कोरियन वन थियो ।
सरकारको ययो निर्णयले विदेशीलगानीकर्ता दक्षिण कोरियाली बजारप्रति आकर्षित भएका छन् । विदेशी लगानीकर्ताले बुधबार १.५ ट्रिलियन वनबराबरको सेयर खरिद गरेका छन् भने संस्थागत लगानीकर्ताले १.१ ट्रिलियन वनबराबरको सेयर खरिद गरेका छन् ।
दक्षिण कोरियाको सरकारले गत जुलाईमा सेयरहोल्डर ट्याक्स थ्रेसहोल्डलाई कडाई गर्ने र ३५ प्रतिशत लाभांश कर लगाउने प्रस्ताव गरेको थियो । जुन अपेक्षा गरिएको भन्दा बढी थियो । जसका कारण त्यसदिन कोस्पी इन्डेक्स ३.८८ प्रतिशतले घटेको थियो ।
तर सत्ताधारी पार्टीले ५ बिलियन वनको थ्रेसहोल्ड कायम गर्न आग्रह गरेको थियो र राष्ट्रपति लिजेई म्युङले आफ्नो १ सय दिनको कार्यकाल सफलतापूर्वक पार गरेको अवसरमा थ्रेसहोल्ड बढाउने घोषणासँगै बजारको मुड सिफ्ट भएको छ । उक्त अवसरमाम उनले पूँजीबजार सुधारको प्याकेज समेत ल्याउने बताएका छन् ।
यस्तै आज समेत कोस्पी इन्डेक्सले वृद्धिका साथ कारोबारको थालनी गरेको छ । यो समाचार तयार पार्दासम्म कोस्पी इन्डेक्स ०.१३ प्रतिशतले बढेर ३ हजार ३१८ विन्दुमा कारोबार भईरहेको छ ।
