काठमाडौं । देशका विभिन्न मुख्य राजमार्गहरू अवरुद्ध भएका छन् ।
कोशी राजमार्ग, सिद्धिचरण लोकमार्ग, गल्छि–त्रिशूली सडक, अरनिको राजमार्ग, नारायणगढ–मुग्लिन सडकखण्ड, कालीगण्डकी करिडोर, पूर्व–पश्चिम राजमार्ग, रत्न राजमार्ग, मध्यपहाडी लोकमार्ग लगायतका सडकका विभिन्न क्षेत्रमा सडक अवरुद्ध बनेको हो ।
सडक अवरुद्ध भएपछि यात्रामा रहेका यात्रुहरू अलपत्र बनेका छन् । नेपालीहरूको मुख्य चाड दशैंको पूर्वसन्ध्यामा राजमार्गमा अवरोध भएपछि यसबारे चासो बढेको छ ।
शनिबार दिउँसो सिंहदरबारस्थित भौतिक, पूर्वाधार तथा यातायात मन्त्रालयमा आकस्मिक बैठक पनि बसेको छ । भौतिकसहित ऊर्जा र शहरी विकास मन्त्रालयको जिम्मेवारी सम्हालिरहेका कुलमान घिसिङको नेतृत्वमा भएको आकस्मिक बैठकमा सडक खुलाउनेबारे छलफल भइरहेको छ ।
सडक विभाग, गृह मन्त्रालय, यातायात व्यवसायी महासंघ र मजदुर र सुरक्षा अधिकारीहरूले सडकखण्डका बारेमा मन्त्री कुलमान घिसिङलाई जानकारी पनि गराएका छन् ।
शुक्रबार रातिदेखि नारायणगढ–मुग्लिन सडक अवरुद्ध छ । पहिरो खस्ने क्रम नरोकिएपछि सडक खुलाउन कठिनाइ भएको छ । यात्रुहरु रातिदेखि नै अलपत्र परेका छन् ।
