काठमाडौं । अर्थमन्त्री रामेश्वर खनालले निजी क्षेत्रमाथिको आक्रमण राष्ट्रिय सम्पत्तिमाथिको आक्रमण भएको बताएका छन् । काठमाडौंमा आयोजना गरिएको ‘क्यापासिटी बिल्डिङ फर फिमेल इकोनोमिक जर्नालिस्ट’ कार्यक्रममा बोल्दै अर्थमन्त्री खनालले यस्तो बताएका हुन् ।
निजी क्षेत्रले सिर्जना गरेको भौतिक सम्पत्ति राष्ट्रको सम्पत्ति भएको बताउँदै उनले त्यसमाथिको आक्रमणले देशको लगानीको वातावरण बिगार्ने बताए । उनले सञ्चारमाध्यमले ‘सम्पत्ति’ र ‘स्वामित्व’बीचको भिन्नता स्पष्ट रूपमा बुझेर समाचार सम्प्रेषण गर्नुपर्नेमा जोड दिए ।
खनालले गलत सूचना र हेडलाइनका कारण बजारमा अनावश्यक रूपमा नकारात्मक वा सकारात्मक प्रभाव पर्ने गरेको उल्लेख गर्दै यसले लगानीकर्तालाई निरुत्साहित गर्ने बताए ।
