काठमाडौं । इरानका विदेशमन्त्री अब्बास अराघचीले लेबनानमा भएको युद्धविराम अवधिभर होर्मुज जलघाँटी “पूर्ण रूपमा खुला” रहने बताएका छन्।
उनका अनुसार, यो १० दिनको युद्धविराम अवधिमा सबै व्यावसायिक जहाजहरूलाई उक्त जलमार्गबाट आवतजावत गर्न अनुमति दिइएको छ।
अराघचीले एक्स (ट्वीटर)मा भनेका छन्– लेबनानमा भएको युद्धविरामअनुसार, होर्मुज जलघाँटी हुँदै सबै व्यावसायिक जहाजहरूको आवागमनलाई युद्धविरामको बाँकी अवधिसम्म पूर्ण रूपमा खुला घोषणा गरिएको छ।
यो आवागमन इरान इस्लामिक गणतन्त्रको बन्दरगाह तथा समुद्री संगठनले पहिले नै घोषणा गरेको समन्वित मार्गअनुसार सञ्चालन हुनेछ। उनको यो घोषणासँगै विश्वभर भइरहेको इन्धन सङ्कट समाधान हुने अपेक्षा गरिएको छ।
यसअघि इरानले फेब्रुअरीमा अमेरिका–इजरायलको आक्रमणको जवाफमा विश्वकै सबैभन्दा व्यस्त तेल ढुवानी मार्ग होर्मुज जलघाँटीलाई केही हप्तासम्म प्रभावकारी रूपमा बन्द गरेको थियो।
इरान र अमेरिकाबीच दुई हप्ताको युद्धविराम लागू भएको छ, जुन अप्रिल २२ मा समाप्त हुने तय छ।
इरानले अमेरिकासँग वार्ताअघि लेबनानसहित सम्पूर्ण मध्यपूर्व क्षेत्रमा युद्धविराम हुनुपर्ने सर्त राखेको थियो। तर इजरायल र अमेरिकाले भने युद्धविराम सम्झौतामा लेबनान समावेश नभएको बताएका थिए।
त्यस समयमा इरान र वार्तामा मध्यस्थता गरिरहेको पाकिस्तानले पनि युद्धविराममा लेबनानलाई समावेश गर्नुपर्ने बताएको थियो।
