काठमाडौँ / चालू आर्थिक वर्ष २०८३/०८४को पहिलो प्रथम त्रैमाससम्म वाणिज्य बैंकहरूले १९ अर्ब बढी खुद नाफा कमाएका छन् । बैंकले प्रकाशित गरेको अपरिष्कृत वित्तीय विवरणअनुसार असोज मसान्तसम्म २० वाणिज्य बैंकहरूले कुल १९ अर्ब १२ करोड ७४ लाख खुद नाफा कमाएका हुन् । जुन गत आर्थिक वर्षको सोही अवधिको तुलनामा ४५.४६ प्रतिशत बढी हो । गत आर्थिक वर्षको पहिलो त्रैमासमा २० वाणिज्य बैंकको नाफा रकम १३ अर्ब १४ करोड ९८ लाख रुपैयाँ मात्रै रहेको थियो ।
समीक्षा अवधिमा गत बर्षको तुलनामा सिटिजन्स बैंक, हिमालयन बैंक, प्राइम बैंक र स्ट्यान्डर्ड चाटर्ड बैंककाे नाफा रकम घटेकाे देखिन्छ भने अन्य सबै बैंकको नाफा रकम १.७० प्रतिशतदेखि २५२२.४७ प्रतिशतसम्मले बृद्धि भएको तथ्याङ्क छ ।
नाफा वृद्धिको दरका आधारमा नेपाल इन्भेष्टमेण्ट मेगा बैंकले सबैभन्दा ठुलो फड्को मारेको छ भने कृषि विकास बैंक र सिद्धार्थ बैंकले नाफा बृद्धि गर्ने बैंकको सूचीमा दोस्रो र तेस्रो स्थानमा छन् ।
नाफा रकममा नबिल अगाडि, बृद्धिदरमा इन्भेष्टमेण्ट मेगाको फड्को
समीक्षा अवधिमा नबिल बैंकले सर्वाधिक २ अर्ब ५५ करोड ५१ लाख खुद नाफा कमाएको छ । नविल बैंकको नाफा रकम गत आर्थिक बर्षको पहिलो त्रैमासको तुलनामा ४५.४३ प्रतिशतले बढेको हो । त्यस्तै नाफा २४.४९ प्रतिशतले बढाएर ग्लोबल आइएमई बैंकले असोजसान्तसम्म २ अर्ब ३१ करोड ३८ लाख रुपैयाँ पुर्याएको छ । तेस्रो स्थानमा रहेको राष्ट्रिय वाणिज्य बैंकको नाफा १ अर्ब ६४ करोड ९६ लाख रुपैयाँ रहेको छ ।
यसैगरी, एभरेष्ट बैंकको नाफा रकम समीक्षा अवधिमा १ अर्ब २५ करोड २७ लाख पुगेको छ भने प्राइम कमर्सियल बैंकको १ अर्ब १८ करोड ७६ लाख रुपैयाँ रहेको छ ।
असोज मसान्तसम्म प्रतिशतका आधारमा नेपाल इन्भेष्टमेण्ट मेगा बैंक नाफा वृद्धि गर्ने कम्पनीको सूचीमा पहिलो स्थानमा रहेको छ । यो बैंकले नाफा रकम २५२२२.४७ प्रतिशतले वृद्धि गरी १ अर्ब १८ करोड १४ लाख रुपैयाँ पुर्याएको हो ।
त्यस्तै, दोस्रो स्थानमा रहेको कृषि विकास बैंकको नाफा १८०३.७१ प्रतिशतले बढेर १० करोड ९२ लाख ३५ हजार रुपैयाँ पुगेको छ । यसैगरी राष्ट्रिय वाणिज्य बैंकको नाफा १७५.५२ प्रतिशतले बढेर १ अर्ब ६४ करोड ९६ लाख ३७ हजार रुपैयाँ पुगेको छ भने सिद्धार्थ बैंकको नाफा १६२.७५ प्रतिशतले बढेर ८५ करोड १५ लाख ६५ हजार रुपैयाँ कायम भएको छ ।
समीक्षा अवधिमा सानिमा बैंकले पनि नाफा रकम १३१.१३ प्रतिशतले बढाएर १ अर्ब ५ करोड १४ लाख रुपैयाँ पुर्याएको देखिन्छ । यस अवधिमा सिटिजन्स बैंकले गत आर्थिक वर्षको पहिलो त्रैमासको २२ करोड नोक्सानीलाई सुधारेर १० करोड ७७ लाख नाफामा फर्किएको छ ।
खुद नाफामा उत्साहजनक सुधार देखिए तापनि निष्क्रिय कर्जा र प्रोभिजनिङको चापका कारण समग्र बैंकिङ क्षेत्रको कुल वितरणयोग्य भने ९ अर्ब ७ करोड ८० लाख रुपैयाँले ऋणात्मक रहेको देखिन्छ ।
