काठमाडौं, जेठ १७ । पछिल्लो पटक सञ्चालनमा आएका लघुबीमा कम्पनीले पनि प्राथमिक शेयर निष्कासन(आईपीओ) गर्ने तयारी शुरु गरेका छन् ।
नियामकबाट लघुबीमा व्यवसाय गर्न अनुमति पाएका सात वटा लघु जीवन बीमा र निर्जीवन बीमा कम्पनीमध्ये पाँच वटा कम्पनीले आईपीओ निष्कासन प्रक्रिया अगाडि बढाएका हुन् । ती कम्पनीले आईपीओ निष्कासन गर्ने प्रस्ताव वार्षिक साधारण सभाबाट पारित गराइसकेका छन् ।
हालैमात्र क्रेष्ट माइक्रो लाइफ इन्स्योरेन्स र गार्डियन माइक्रो लाइफ इन्स्योरेन्सले आईपीओ निष्कासन गर्ने प्रक्रिया अगाडि बढाएका छन् । ती दुवै कम्पनीले आईपीओ निष्कासन गर्नका लागि बिक्री प्रबन्धक पनि नियुक्त गरिसकेका छन् ।
गार्डियन माइक्रो लाइफ इन्स्योरेन्स २२ लाख ५० हजार कित्ता आईपीओ निष्कासन गर्ने तयारीमा छ । कम्पनीले धितोपत्र शेयर निष्कासन तथा बिक्री प्रबन्धकमा कुमारी क्याफिटललाई नियुक्त गरेको छ ।
यसैगरी, क्रेष्ट माइक्रो लाइफ इन्स्योरेन्सले पनि २२ लाख ५० हजार कित्ता आईपीओ निष्कासन गर्ने तयारी गरेको छ ।कम्पनीले धितोपत्र निष्कासन तथा बिक्री प्रबन्धकमा एनआईएमबि एस क्यापिटललाई नियुक्त गरेको छ ।
स्टार माइक्रो इन्स्योरेन्स, प्रोटेक्टिभ माइक्रो इन्स्योरेन्स र नेपाल माइक्रो इन्स्योरेन्सले पनि आईपीओ निष्कासन गर्ने प्रस्ताव साधारण सभाबाट पारित गराइसकेका छन् । अब आवश्यक प्रक्रिया पूरा गरेका ती कम्पनीले नियामक निकाय नेपाल धितोपत्र बोर्डमा निवेदन दिएर स्वीकृति पाएपछि आईपीओ निष्कासन गर्नेछन् ।
नेपाल राष्ट्र बैंकले ग्रामीण क्षेत्रमा स–साना ऋण प्रवाह गर्ने गरी लघुवित्त कम्पनीको सञ्चालन अनुमति दिएजस्तै गत वर्ष मात्रै नेपाल बीमा प्राधिकरणले पनि लघुबीमा कम्पनीलाई पनि व्यवसाय सञ्चालन अनुमति दिएको छ । प्राधिकरणले गत मंसिर ११ गते तीन लघु जीवन बीमा र चार लघु निर्जीवन बीमा गरी सातओटा लघुबीमा कम्पनीलाई लाइसेन्स बाँडेको थियो ।
लघुजीवन बीमा व्यवसायतर्फ गार्डियन माइक्रो लाइफ इन्स्योरन्स, क्रेष्ट माइत्रो लाइफ इन्स्योरेन्स र लिबर्टी माइक्रो लाइफ इन्स्योरेन्स कम्पनी छन् भने निर्जीवन लघु बीमा व्यवसायतर्फ ट्रष्ट माइक्रो इन्स्योरेन्स कम्पनी, नेपाल माइक्रो इन्स्योरेन्स, स्टार माइक्रो इन्स्योरेन्स र प्रोटेक्टिभ माइक्रो इन्स्योरेन्स कम्पनी छन् ।
प्राधिकरणले लघुबीमा निर्देशिका, २०७६ लाई संशोधन गर्दै ५ लाख रूपैयाँसम्मको लघुबीमा पोलिसी बिक्री गर्न पाउने व्यवस्था गरेको छ । लघुबीमा व्यवसाय सञ्चालन गर्ने कम्पनीहरुको न्यूनतम चुक्तापूँजी ७५ करोड रुपैयाँ छ ।
लघुबीमा कम्पनीहरूले दुर्गम, ग्रामीण तथा शहरी क्षेत्रका सीमान्तकृत र न्यून आय भएका समुदायलाई भविष्यमा हुन सक्ने जोखिम न्यूनीकरण गर्न बीमा गर्छन् ।
निर्जीवन बीमा कम्पनीहरुले ल्याएका लघुबीमा योजना प्रभावकारी नभएको र ती कम्पनीहरु शहरमा मात्रै केन्द्रित भएको जनगुनासो आएपछि सरकारले छुट्टै लघु बीमा कम्पनी खोल्ने व्यवस्था गरेको हो ।
