काठमाडौं, जेठ १८ । ग्लोबल आइएमई बैंकका कर्मचारी सवार बस दुर्घटना भएको छ ।
बीपी राजमार्गअन्तर्गत सिन्धुलीको गोलन्जोर गाउँपालिका- ७ तल्लो बारामा बस बिहीबार दुर्घटना भएको छ । दुर्घटनाबाट २५ जना घाइते भएका छन् ।
महोत्तरीको बर्दिवासबाट बीपी राजमार्ग हुँदै काठमाडौंतर्फ जाँदै गरेको बस वाग्मती प्रदेश ०१० प ०१ – १७३२ पर्यटक बस बिहीबार अपराह्न दुर्घटना भएको हो । दुर्घटनामा घाइते भएकालाई स्थानीय शुभजीवन अस्पताल खुर्कोटमा पठाइएको छ । गम्भीर घाइतेलाई धुलिखेल अस्पताल पठाइएको छ । घाइतेहरु सबै खतरामुक्त रहेको प्रहरीले जनाएको छ ।
बसमा २८ जना सवार रहेको जिल्ला प्रहरी कार्यालय सिन्धुलीका डीएसपी अनिलकुमार खड्काले जानकारी दिए । उनका अनुसार ती कर्मचारीहरु बर्दिवासमा तालिममा सहभागी भएर फर्किंदै थिए ।
घटनास्थलमा प्रहरी, स्थानीयलगायतले उद्धार गरेका थिए । बस सडकबाट ३० मिटर खसेर स्थानीयको घर पछाडि उत्तानो परेको छ ।
