काठमाडौं, माघ २१ । देशका अधिकांश स्थानमा आज मौसम सामान्यतया सफा रहनेछ । हाल नेपालमा कुनै पनि मौसमी प्रणालीको उल्लेखनीय प्रभाव नरहँदा मौसम सफा रहने भएको हो ।
जल तथा मौसम विज्ञान विभागका अनुसार बिहान पहाडी तथा हिमाली भू–भागको मौसम मुख्यतया सफा रहेको छ । तराईका धेरै स्थानमा हुस्सु÷कुहिरो लागेको छ ।
दिउँसो लुम्बिनी, कर्णाली र सुदूरपश्चिम प्रदेशका केही स्थानमा भने आंशिक बदली हुनेछ । हिमपात र वर्षाको सम्भावना भने नरहेको मौसमविद् सञ्जिव अधिकारी बताउँछन् ।
उनका अनुसार काठमााडौं उपत्यकामा बिहान केही हुस्सु लागे पनि दिउँसो खुल्नेछ । काठमाडौंमा बिहान ६ : १० को न्यूनतम तापक्रम ४.८ डिग्री सेल्सियस रहेको छ ।
यसैबीच, पश्चिमी न्यून चापीय प्रणाली भित्रिएर भोलि (मंगलबार) भने पश्चिम नेपालका केही स्थानमा वर्षा गराउनेछ ।
“नयाँ प्रणाली आउँदा भोलि देशभर आंशिक बदली हुनेछ । तर, देशभर वर्षा हुने होइन,” मौसमविद् अधिकारी बाह्रखरीसँग भन्छन् ।
पश्चिमी न्यून चापीय प्रणालीका कारण गण्डकी प्रदेशमा वर्षा र हिमपातको सम्भावना छ । “लुम्बिनीमा वर्षाको सम्भावना छ । कर्णाली र सदूरपश्चिममा वर्षा र हिमपातको सम्भावना छ,” मौसमविद् अधिकारीले भने, “वर्षा हुने प्रदेशमा पनि सबै भूभागमा वर्षा हुने होइन, केही क्षेत्रमा मात्र हुन्छ ।”
बुधबारसम्म भने यो प्रणाली कमजोर भइसक्ने र वर्षाको सम्भावना नरहेको उनले जानकारी दिए । मौसमविद् अधिकारीका अनुसार बुधबार देशका धेरै स्थानमा मौसम सफा हुनेछ ।
