५ चैत्र २०८१, मंगलबार
काठमाडौं – त्रिभुवन विश्वविद्यालयअन्तर्गतका आंगिक र सम्बन्धन प्राप्त क्याम्पसमा मंगलबार स्वतन्त्र विद्यार्थी युनियन (स्ववियु) निर्वाचन हुँदैछ । नेपालको सबैभन्दा जेठो विश्वविद्यालय त्रिभुवन विश्वविद्यालयमातहतमा रहेका ६४ वटा आंगिक क्याम्पस (६२ वटा क्याम्पसमा कक्षा सञ्चालन) र एक हजार ५३ सम्बन्धन प्राप्त क्याम्पस छन् ।
उच्च शिक्षा अध्ययन गर्ने विद्यार्थीको हक, हितको संरक्षण तथा सम्वर्द्धन गर्दै अनुसन्धानमूलक, बौद्धिक, प्राज्ञिक र चारित्रिक विकास गर्न, विद्यार्थीहरूमा शैक्षिक तथा सामाजिक मूल्य-मान्यता स्थापित गर्न शिक्षक, कर्मचारी र विद्यार्थीबीच आपसी समन्वयका साथ अनुशासन कायम राख्न स्ववियुको महत्वपूर्ण भूमिका मानिन्छ ।
यस्तै पठनपाठनका लागि उपयुक्त वातावरण तयार गर्न र अतिरिक्त क्रियाकलाप तथा खेलकुदका माध्यमबाट विद्यार्थीको चौतर्फी विकासमा पनि स्ववियुको महत्वपूर्ण भूमिका रहँदै आएको छ।
विश्वविद्यालय संगठन तथा शैक्षिक प्रशासनसम्बन्धी नियम, २०५० र स्ववियु निर्वाचनसम्बन्धी निर्देशिकामा उल्लेख भएबमोजिम निर्वाचन हुन गइरहेको निर्वाचन केन्द्रीय अनुगमन तथा समन्वय समिति सदस्य सचिव प्रा. पशुपति अधिकारीले बताए ।
उनले विश्वविद्यालयका दुई वटा आंगिक र ८५ भन्दा बढी सम्बन्धन प्राप्त क्याम्पसमा निर्विरोध निर्वाचन सम्पन्न भइसकेको पनि जानकारी दिए । सदस्य सचिव अधिकारीले १३ वटा आंगिक क्याम्पसहरुमा निर्वाचन प्रक्रिया अगाडि बढाउन समझदारीको प्रयास भइरहेको पनि बताए ।
