काठमाडौं, फागुन २० । पछिल्लाे समय देशभरमा चितवनको शिशु निकेतन विद्यालयभित्र एक विद्यार्थी मृत भेटिएकाे विषयलाई लिएर चर्काे विवाद चलिरहेकाे छ । चितवनको रत्नगर नगरपालिका–१० स्थित विद्यालयकाे हाेस्टलकाे काेठामा शालिन पोखरेलको मृत अवस्थामा भेटिएपछि परिवारजनले बलात्कार पछिकाे हत्या भएकाे बताउँदै आएको थियो । तर पोस्टमार्टम रिपाेर्टमा भने बलात्कार नभएकाे पुष्टि गरेको छ।
त्रिवि शिक्षण अस्पताल, महाराजगञ्जमा गरिएको पोस्टमार्टमबाट १४ वर्षिय शालिनकाे बलात्कार भएकाे वा यौनजन्य अपराधका कुनै संकेत नभेटिएको बताइएकाे छ । आइतबार चिकित्सकहरुले पोष्टमार्टम जाँचको प्रतिवेदन तयार गरेका हुन् । उक्त रिपाेर्टमा शालिनको झुण्डिएका कारण मृत्यु भएको उल्लेख गरिएकाे छ।
यसकासाथै शालिनको कोठामा एक ‘सुसाइड नोट’ भेटिएको थियाे । जसकाे प्रहरीले जाँच गर्ने भएको छ । शालिनका बुवाले उक्त नोटमाथि आशंका गरेकाे भन्दै प्रहरीद्वारा ‘सुसाइड नोट’ को नेपाल प्रहरी केन्द्रीय विधि विज्ञान प्रयोगशालामा जाँच गरिने भएको हो । उक्त सुसाइड नाेटमा ‘सरी ममी, सरी ड्याडी, सरी एभ्रिबडी’ लेखिएकाे छ ।
फागुन १२ गते, विद्यालयको हाेस्टलको कोठामा शालिन झुण्डिएकाे अवस्थामा भेटिएकी थिइन् । त्यसछि उनको शव पोस्टमार्टमका लागि भरतपुर अस्पताल लगिएको थियो । तर, परिवारले अस्पतालको विश्वास नभएको भन्दै त्यहाँबाट शव त्रिवि शिक्षण अस्पतालमा काठमाडौं ल्याएको थियाे ।
