काठमाडौं । कोटेश्वर अन्डरपास वि.सं.२०९० मा बनिसक्ने भएको छ । सरकारले तयार गरेको समय तालिका अनुसार उक्त संरचना २०९० भदौ १५ गतेमा सम्पन्न गर्ने लक्ष्य लिइएको छ ।
जापान सरकारको झन्डै ३० अर्ब रुपैयाँ ऋण सहयोगमा निर्माण हुन लागेको उक्त आयोजनाको लागि यही सेप्टेम्बरमा ऋण सम्झौता हुनेछ ।आगामी वर्ष चैतसम्ममा डीपीआर तथा ईआईएको लागि परामर्शदाता कम्पनीसँग सम्झौता गर्ने र एक वर्षभित्र त्यसको प्रक्रिया टुङ्ग्याउने कार्यतालिका छ ।
उक्त परियोजनाका लागि त्यसपछि निर्माण कम्पनी छनोटको ठेक्का प्रक्रिया सुरु हुनेछ । २०२८ अप्रिलमा ठेक्का सम्झौता गर्ने र त्यसको ५२ महिनामा निर्माण सम्पन्न गर्ने लक्ष्य लिइएको छ ।
यस अनुसार तीनकुनेदेखि त्रिभुवन विमानस्थलसम्म ६६४ मिटरको फ्लाइओभर बन्नेछ । विमानस्थलभित्र ७०० मिटरको सुरुङ तथा त्रिभुवन विमानस्थलदेखि जडिबुटी हुँदै मनोहरासम्म २३८ मिटरको अर्को फ्लाइओभर बन्नेछ ।
अहिले उक्त परियोजनाका लागि जापानी सहयोग नियोग जाइकाले परामर्शदाता छनोट गरी प्रारम्भिक सर्वेक्षण रिपोर्ट तयार गरेको सडक विभागले जनाएको छ।
