काठमाडौं–चालू आर्थिक वर्षको साउन महिनामा घरजग्गा कारोबारमा कमी आएको छ । आर्थिक वर्ष २०८१÷०८२ को साउन महिनाको तुलनामा आर्थिक वर्ष २०८२/०८३ को सोहि महिनामा घरजग्गा कारोबार २८ प्रतिशतले कमी आएको हो । २०८१ साउनमा नेपालभरि ४३ हजार ८ सय ३५ वटा घरजग्गा कारोबार भएका थिए ।
२०८२ साउनमा भने ३१ हजार ६ सय २१ वटा मात्रै घरजग्गा कारोबार भएका छन् । गत असारमा देशभरि ५५ हजार ५ सय २४ वटा कारोबार भएका थिए । समीक्षा अवधिमा काठमाडौं उपत्यकामा ३ हजार २० घरजग्गा कारोबार भएका छन् । साउनमा ललितपुर लगनखेल मालपोत कार्यालयबाट ६ सय १६ र गोटीखेल मालपोत कार्यालयबाट ६ वटा मात्रै घरजग्गा कारोबार भएको छ ।
भक्तपुर मालपोत कार्यालयबाट ८ सय २० कारोबार भएको छ । काठमाडौंमा डिल्लीबजार मालपोत कार्यालयबाट १ सय ६३, चाबहिल मालपोत कार्यालयबाट ३ सय ६२, कलंकी मालपोत कार्यालयबाट ४ सय ६६, मनमैजु मालपोत कार्यालयबाट २ सय ४, साँखु मालपोत कार्यालयबाट २ सय ६३ र टोखा मालपोत कार्यालयबाट १ सय ११ घरजग्गा कारोबार भएका हुन् ।
