काठमाडौं । भारत सरकारले विपद् प्रभावित क्षेत्रमा तत्काल सडक सञ्जाल सुचारु गर्न नेपाललाई १० वटा बेली ब्रिज अनुदानमा दिने भएको छ । बिहीबार पहिलो ब्रिज औपचारिक रूपमा हस्तान्तरण गरिएको छ ।
हेटौंडामा आयोजित विशेष समारोहमा नेपालका लागि भारतीय राजदूत नवीन श्रीवास्तवले भौतिक पूर्वाधार तथा यातायात मन्त्री कुलमान घिसिङको उपस्थितिमा उक्त बेली ब्रिज नेपाल सरकारलाई हस्तान्तरण गरेका हुन् ।
सडक विभागका महानिर्देशक विजय जैसीका अनुसार गत असोजको बाढी–पहिरोले अवरुद्ध बनाएको सडक, विशेष गरी कोशी प्रदेश र अन्य क्षेत्रमा यी ब्रिज जडान गरिनेछ । नेपाल सरकारको अनुरोधमा भारतले गत वर्षझैं यस वर्ष पनि १० वटा बेली ब्रिज सहयोग गरेको हो ।
“गत वर्ष भारतले दिएको १० वटा ब्रिज विभिन्न ठाउँमा जडान गरेर यातायात सुचारु गरेका थियौं । यसपटक पनि हेवा खोला, बागमती नदी, लार्छालगायत महत्त्वपूर्ण स्थानमा यी ब्रिज राखिनेछन्,” महानिर्देशक जैसीले भने ।
हस्तान्तरण गरिएका बेली ब्रिजहरू ७० मिटरभन्दा लामा, ४.२५ मिटर चौडा (सिंगल लेन) र ३८ मेट्रिक टनसम्म भार थेग्न सक्ने क्षमताका छन् । यी ब्रिज चाँडै नै विपद् प्रभावित क्षेत्रमा जडान गरी अवरुद्ध सडक खुलाइने विभागले जनाएको छ ।
भौतिक पूर्वाधार तथा यातायात मन्त्रालयका सचिव केशव कुमार शर्माका अनुसार भारतको ‘गार्डन रिच’ कम्पनीका इन्जिनियरहरूको टोली छिट्टै नेपाल आउँदैछ । उनीहरूले नेपाली प्राविधिक टोलीलाई तालिम र क्षमता विकासमा सहयोग गर्नेछन् तथा ब्रिज जडानमा प्रत्यक्ष सहायता प्रदान गर्नेछन् ।
यस सहयोगले बाढी–पहिरोबाट प्रभावित हजारौं नागरिकको यातायात आवागमनमा ठूलो राहत पुग्ने अपेक्षा गरिएको छ ।
