काठमाडौँ / कामना सेवा विकास बैंक लिमिटेडले चालु आर्थिक वर्ष २०८२/८३ को तेस्रो त्रैमाससम्म नाफा रकममा १९.३७ प्रतिशतले वृद्धि गरेको छ ।
गत आर्थिक वर्षको सोही अवधिमा ४९ करोड ३१ लाख रुपैयाँ खुद नाफा कमाएको बैंकले समीक्षा अवधिमा सो रकम बढाएर ५८ करोड ८६ लाख रुपैयाँ पुर्याएको हो ।
बैंकको नाफा रकम बढेको भए पनि वितरणयोग्य मुनाफा भने १६.४६ प्रतिशतले घटेर ४१ करोड ७६ लाख रुपैयाँमा सीमित भएको छ। खुद ब्याज आम्दानी र सञ्चालन आम्दानीमा बढेसँगै बैंकको नाफा बढ्न सहयोग पुगेको देखिन्छ ।
समीक्षा अवधिमा खुद ब्याज आम्दानी ९.२६ प्रतिशतले बढेर १ अर्ब ८१ करोड रुपैयाँ पुगेको छ भने खुद फि तथा कमिशन आम्दानी ९.६० प्रतिशतले वृद्धि भई २४ करोड ६७ लाख रुपैयाँ पुगेको हो ।
कुल सञ्चालन आम्दानी ८.४४ प्रतिशतले बढेर २ अर्ब १२ करोड ७२ लाख रुपैयाँ र सञ्चालन मुनाफा १८.३४ प्रतिशतले बढेर ८४ करोड ७४ लाख रुपैयाँ पुगेको छ ।
इम्पेरमेन्ट चार्ज ३१ करोड ७१ लाख रुपैयाँबाट घटेर २८ करोड ६२ लाख रुपैयाँ कायम भएसँगै बैंकको नाफामा सुधार भएको देखिन्छ ।
नाफा बढेको भए पनि बैंकको खराब कर्जा रकम भने बढेको छ । गत वर्ष ४.२७ प्रतिशत रहेको बैंकको खराब कर्जा समीक्षा अवधिमा बढेर ४.४० प्रतिशत पुगेको हो ।
बैंकको वितरणयोग्य प्रतिशेयर आम्दानी घटेर १४ रुपैयाँ ४२ पैसा पुगेको छ भने प्रतिशेयर आम्दानी २० रुपैयाँ ३२ पैसा कायम भएको छ।बैंकको मूल्य आम्दानी अनुपात २४.२ गुणा र प्रतिशेयर नेटवर्थ १६३ रुपैयाँ ५७ पैसा रहेको छ।
समीक्षा अवधिमा बैंकको चुक्ता पूँजी ४ अर्ब २१ करोड १९ लाख रुपैयाँ रहेको छ, जसमा ३५ करोड रुपैयाँको ९ प्रतिशत अविमोच्य असञ्चिति अग्राधिकार शेयर समावेश छ।
जगेडा कोषमा २ अर्ब ४५ करोड ४९ लाख रुपैयाँ सञ्चित गरेको बैंकले समीक्षा अवधिमा बैंकले ६४ अर्ब ९५ करोड ७ लाख रुपैयाँ निक्षेप सङ्कलन गरी ५३ अर्ब ५३ करोड ८६ लाख रुपैयाँ कर्जा लगानी गरेको छ ।
