काठमाडौँ । रिलायन्स स्पिनिङ मिल्स लिमिटेडले चालु आर्थिक वर्ष २०८३/०८४ को पहिलो त्रैमासमा प्रतिसेयर आम्दानी (इपीएस) मा उल्लेख्य सुधार गरेको छ । कम्पनीले बिहीबार सार्वजनिक गरेको पहिलो त्रैमासिक अपरिष्कृत वित्तीय विवरणअनुसार वार्षिकीकरण गरिएको इपीएस ६२.९७ रुपैयाँ रहेको छ ।
गत आर्थिक वर्षमा वार्षिकीकरण गरिएको इपीएस ४२.९८ रुपैयाँ थियो । समीक्षा अवधिको नाफालाई हाल कायम सेयर संख्याका आधारमा हेर्दा त्रैमासिक इपीएस करिब १६ रुपैयाँ देखिन्छ ।
समीक्षा अवधिमा कम्पनीको खुद नाफा ३० करोड ४८ लाख ५९ हजार रुपैयाँ पुगेको छ । गत आर्थिक वर्षको सोही अवधिमा कम्पनीको खुद नाफा ६ करोड ८८ लाख ९० हजार रुपैयाँ रहेको थियो । यस आधारमा कम्पनीको त्रैमासिक नाफा करिब ४.४३ गुणाले बढेको छ ।
नेपालको सबैभन्दा ठूलो रोजगारदाता र निर्यातमुखी धागो उत्पादक कम्पनी रिलायन्स स्पिनिङ मिल्स गत आर्थिक वर्षमा नेपाल स्टक एक्स्चेन्ज (नेप्से) मा सूचीकरण भएको थियो । कम्पनीको चुक्ता पुँजी १ अर्ब ९० करोड रुपैयाँ रहेको छ ।
इपीएसमा भएको सुधारसँगै कम्पनीको सञ्चालन नाफामा पनि उल्लेख्य वृद्धि भएको छ । पहिलो त्रैमासमा कम्पनीले ३ अर्ब २० करोड २९ लाख रुपैयाँ सञ्चालन आम्दानी गरेको छ । गत आर्थिक वर्षको पहिलो त्रैमासमा यस्तो आम्दानी २ अर्ब ४८ करोड ७१ लाख रुपैयाँ थियो । यस हिसाबले सञ्चालन आम्दानी करिब २९ प्रतिशतले बढेको छ ।
कम्पनीको कुल नाफा बढ्नुमा बिक्री तथा सञ्चालन आम्दानीमा भएको वृद्धि मुख्य कारण हो । समीक्षा अवधिमा कम्पनीको सञ्चालन नाफा ४० करोड ५७ लाख रुपैयाँ पुगेको छ, जुन अघिल्लो वर्षको सोही अवधिको १६ करोड ९१ लाख रुपैयाँभन्दा दोब्बरभन्दा पनि बढी हो ।
३० प्रतिशत नगद लाभांश वितरण
रिलायन्सले आर्थिक वर्ष २०८२/०८३ को मुनाफाबाट शेयरधनीलाई ३० प्रतिशत नगद लाभांश वितरण पनि गरेको छ । कम्पनीको चुक्ता पूँजी १ अर्ब ९० करोड रुपैयाँको ३० प्रतिशत (५७ करोड रुपैयाँ नगद) लाभांश वितरण गरिएको हो ।
गत असोजमा सम्पन्न साधारणसभाले लाभांश वितरणसँगै व्यवसाय विस्तार गर्नेसम्बन्धी महत्वपूर्ण योजना प्रस्ताव पनि पारित गरेको थियो । कम्पनीको प्रबन्धपत्र संशोधन गरी अत्याधुनिक प्रविधियुक्त उद्योग स्थापना गर्ने र विभिन्न प्रकारका फाइबर उत्पादन गर्ने उद्देश्य योजनामा सामेल छन् । ‘अल्लो, हेम्प, केरा लगायतका प्राकृतिक फाइबरबाट धागो उत्पादन गर्नुका साथै विभिन्न प्रकारका कपडा तथा गार्मेन्ट उत्पादन र फाइबर, धागो तथा कपडाको रङ्गाई गरिनेछ,’ संशोधित प्रावधानमा भनिएको छ ।
कम्पनीले औद्योगिक विस्तार, प्राकृतिक फाइबरमा आधारित उत्पादन तथा कपडा र गार्मेन्ट उद्योगमा प्रवेश गर्ने रणनीति अघि बढाउने भएको छ । कम्पनीको प्रस्तावित व्यवसाय विस्तारले परम्परागत तथा स्थानीय स्रोतमा आधारित फाइबरलाई आधुनिक प्रविधिसँग जोड्दै मूल्य अभिवृद्धि गर्ने लक्ष्य लिएको छ । विशेषगरी फाइबर, धागो, कपडा तथा तयारी पोशाक उत्पादनमा प्रवेश गर्ने योजनालाई कम्पनीको व्यवसाय विविधीकरणको महत्वपूर्ण कदमका रूपमा हेरिएको छ ।
३ दसकअघि स्थापना भएको रिलायन्स स्पिनिङ मिल्सको सुनसरीमा धागो उद्योग कारखाना रहेका छन्, जहाँ ४ हजारभन्दा बढी कामदार कार्यरत छन् । कम्पनीले वार्षिक ५० मिलियन अमेरिकी डलर बराबरको निर्यात गर्दै आएको छ ।
