काठमाण्डौ । साहस ऊर्जा कम्पनी लिमिटेडले चालु आर्थिक वर्षको पहिलो त्रैमासिक वित्तीय विवरण सार्वजनिक गरेको छ । कम्पनीले यस अवधिमा ४९ करोड ४८ लाख रुपैयाँ खुद नाफा आर्जन गरेको छ, जुन अघिल्लो आर्थिक वर्षको सोही अवधिको तुलनामा २३.६५ प्रतिशतले वृद्धि भएको हो । गत वर्ष सोही अवधिमा कम्पनीको खुद नाफा ४० करोड २ लाख रुपैयाँ थियो ।
कम्पनीको विद्युत् बिक्रीबाट हुने आम्दानी ६.६३ प्रतिशतले बढेर ९२ करोड ४६ लाख रुपैयाँ पुगेको छ । यसैगरी, वित्तीय आम्दानी ६ लाख ९१ हजार रुपैयाँ रहेको छ ।
प्रशासनिक खर्च गत वर्षको १ करोड ८३ लाख रुपैयाँबाट बढेर २ करोड ३१ लाख रुपैयाँ पुगेको छ भने वित्तीय खर्च २३ करोड ४० लाख रुपैयाँबाट घटेर १६ करोड ७९ लाख रुपैयाँ कायम भएको छ । कर्मचारी बोनस खर्च भने ८२ लाख ३५ हजार रुपैयाँबाट बढेर १ करोड २ लाख रुपैयाँ भएको छ ।
कम्पनीको रिजर्भ तथा सञ्चित मुनाफा २ अर्ब ९६ करोड रुपैयाँबाट बढेर ३ अर्ब ६५ करोड रुपैयाँ पुगेको छ । चुक्ता पुँजी ३ अर्ब ७८ करोड रुपैयाँ रहेको कम्पनीको कुल चालु सम्पत्ति १ अर्ब १० करोड रुपैयाँ र कुल चालु दायित्व १ अर्ब ६१ करोड रुपैयाँ छ ।
समीक्षा अवधिसम्म कम्पनीको प्रतिसेयर आम्दानी (ईपीएस) ५२.३७ रुपैयाँ, प्रतिसेयर कुल सम्पत्तिको मूल्य (बुक भ्यालु) ४७५.८४ रुपैयाँ, प्रतिसेयर नेटवर्थ १९६.८९ रुपैयाँ र तरलता अनुपात ०.६८ रहेको छ ।
