काठमाण्डौ । श्वेतगंगा हाइड्रोपावर एण्ड कन्स्ट्रक्सन लिमिटेडले चालु आर्थिक वर्षको पहिलो त्रैमासमा आम्दानीमा गिरावट आए पनि खुद नाफा उल्लेखनीय रूपमा वृद्धि गर्न सफल भएको छ । कम्पनीले यस अवधिमा ९ करोड ७२ लाख रुपैयाँ खुद नाफा आर्जन गरेको छ, जुन अघिल्लो आर्थिक वर्षको सोही अवधिको तुलनामा ४८.२० प्रतिशतले बढी हो । गत वर्ष सोही अवधिमा कम्पनीको खुद नाफा ६ करोड ५६ लाख रुपैयाँ थियो ।
कम्पनीको विद्युत् बिक्रीबाट हुने आम्दानी ५.५७ प्रतिशतले घटेर २७ करोड ५१ लाख रुपैयाँ कायम भएको छ । यद्यपि, प्रशासनिक तथा अन्य सञ्चालन खर्च ८२ लाख ६३ हजार रुपैयाँबाट घटेर ५७ लाख ७१ हजार रुपैयाँ र वित्तीय खर्च १२ करोड ८१ लाख रुपैयाँबाट घटेर ९ करोड ११ लाख रुपैयाँमा सीमित भएकोले नाफामा सकारात्मक प्रभाव परेको हो ।
कम्पनीको सञ्चित नोक्सान (रिटेन्ड अर्निङ) ३४ करोड २९ लाख रुपैयाँले ऋणात्मक रहेको छ भने रिजर्भ कोष २६ लाख ३३ हजार रुपैयाँले धनात्मक छ ।
समीक्षा अवधिसम्म कम्पनीको प्रतिसेयर आम्दानी (ईपीएस) ६.११ रुपैयाँ, प्रतिसेयर नेटवर्थ ७८.६४ रुपैयाँ, मूल्य आम्दानी अनुपात (पीई रेसियो) ५५.०७ गुणा र तरलता अनुपात ०.५४ कायम भएको छ ।
